நம்ம சென்னையில் படித்த ஒரு தெலுங்குச் சிட்டு, டோலிவுட்டில் அட்டகாசமாக கலக்க தொடங்கியுள்ளது.

மதனபள்ளியில் பிறந்த அந்த அழகிய நடிகையின் பெயர் பிந்து மாதவி. பயோடெக்னாலஜியில் டிகிரி வாங்கியுள்ள பி்நது மாதவி பிளஸ் ஒன் முதல் சென்னையில் தங்கிப் படித்தவராம்.

ஆவக்காய் பிரியாணி என்ற படம் மூலம் தாய் மொழியாம் தெலுங்கில் அறிமுகமாகிறார் பிந்து மாதவி. படத்தில் மாதவிக்கு சூப்பர் வேடம். அதாவது ஊறுகாய் விற்கும் பெண் வேடமாம். சேலையிலும் கவர்ச்சியை வாரி இறைத்துள்ளாராம் பிந்து மாதவி.

படிப்பில் சராசரி மாணவியான பிந்து மாதவி பள்ளிக்கூடம் மற்றும் கல்லூரியில் கல்ச்சுரல் நிகழ்ச்சிகளில் கலக்கியுள்ளாராம். கலந்து கொண்ட போட்டிகளில் எல்லாம் பரிசுகளை அள்ளாமல் வந்ததில்லையாம் பிந்து.

டைட்டனின் டனிஷ்க் விளம்பரத்தில் இவரது அழகைப் பார்த்து ஆச்சரியப்பட்டுப் போன தெலுங்கு தயாரிப்பாளர்களான சேகர் கம்முலாவும், அனிஷ் குருவில்லாவும் சினிமாவுக்குக் கூட்டி வந்து விட்டனராம்.

ஆவக்காய் பிரியாணி படத்தில் நடிக்க தேர்வான பின்னர் ஒரு மாதம் பிந்து மாதவிக்கு நடிப்புப் பயிற்சி அளித்தார்களாம். ரிஹர்சலும் நடந்ததாம். ஒவ்வொரு சீனையும் ரிஹர்சல் பார்த்து விட்டுத்தான் ஷூட் செய்தார்களாம்.

நடிக்க வருவதற்கு முன்பு சென்னையில் நிறைய மாடலிங் வாய்ப்புகள் வந்ததாம். கிட்டத்தட்ட 20 பேஷன் ஷோக்களில் பூனை நடை போட்டுள்ளாராம். ஆவக்காய் பிரியாணி பட வாய்ப்பு வந்தபோது பிந்துவின் அப்பாதான் நடிக்க பச்சைக் கொடி காட்டினாராம்.

நடிக்க தேர்வானபோது நடந்த ஒரு சுவாரஸ்யமான விஷயத்தைக் கேளுங்கள் என்று ஆர்வத்தோடு பிந்து கூறியதாவது ... ஐஸ்வர்யா ராய் ஹம் தில் தேசுக்கே ஹெய்ன் சனம் படத்தில் நடித்தபோது, காட்சிக்காக நிஜமான பச்சை மிளகாயை கடித்துத் தின்றதாக கேள்விப்பட்டிருந்தேன்.

ஆவக்காய் பிரியாணி படத்திலும் அப்படி ஒரு காட்சியை வைத்தனர். ஐஸ்வர்யாவின் தீவிர ரசிகை நான். எனது குருவே தத்ரூபமாக நடித்தபோது, நான் மட்டும் சும்மாவா. நானும் நிஜ பச்சை மிளகாய்களை நறுக் நறுக்கென கடித்து சாப்பிட்டு நடித்தேன். அப்போது ஒன்றும் தெரியவில்லை. ஆனால் அடுத்து ஒரு மணி நேரத்திற்கு என்னால் வாய் எரிச்சலைத் தாங்க முடியவில்லை .. என்று கண்களில் திரில் நிரம்ப கூறுகிறார் பி்ந்து மாதவி.

பிந்துவின் கண்களுக்குத்தான் காசே என அவரது நெருங்கிய நட்பு வட்டாரம் கூறுவது வழக்கமாம். அந்த அளவுக்கு அவை பேசும் கண்களாம். உணர்ச்சிகளை நான் நடிக்காமல் கண்களிலேயே காட்டி விடுவேன். அந்த அளவுக்கு அவை ஸ்பெஷலானவை என்கிறார் பெரிய கண்களை சின்னதாக சிமிட்டியபடி.

சரி பிந்து, தமிழ் விஜயம் எப்போது..?